پاکستان کرکٹ ٹیم کے سابق کپتان اور اسٹار آل راؤنڈر بوم بوم آفریدی نے شرجیل خان کی واپسی سے متعلق معاملے پر دبے لفظوں میں محمد حفیظ کے موقف کی تائید کردی۔

نجی ٹی وی پر گفتگو میں شاہد آفریدی نے پی ایس ایل فکسنگ اسکینڈل میں سزا یافتہ کرکٹر شرجیل خان کی واپسی سے متعلق کہا کہ بہت ساری چیزوں کو دیکھ کر چلنا پڑتا ہے اور سخت فیصلے بھی کرنے ہوتے ہیں۔

یہ بھی پڑھیئے: شرجیل خان فوری طور پر ٹیم میں واپسی کیلئے تیار دکھائی نہیں دیتے، وقار یونس

انہوں نے اس بات پر افسوس کا اظہار کیا کہ ماضی میں ہم نے ایسی مثالیں قائم نہیں کیں اور یہی وجہ ہے کہ اس طرح کے معاملات اب بھی سامنے آتے رہتے ہیں۔

یہ بھی پڑھیئے:شرجیل خان کا معاملہ، محمد حفیظ کی حمایت میں بھارت سے آواز بلند

بوم بوم نے کہا کہ مستقبل میں اس طرح کے واقعات سے بچنے کیلئے قوانین بنانا ہونگے۔ اگر ماضی میں میچ فکسنگ میں ملوث کھلاڑیوں کیلئے کوئی مثال قائم کی ہوتی تو آج ہمیں بدنامی کا سامنا نہیں کرنا پڑتا۔

واضح رہے کہ گزشتہ دنوں محمد حفیظ نے شرجیل خان کی واپسی سے متعلق بحث پر ایک ٹویٹ میں کہا تھا کہ 'کیا ہمیں ملک کی عزت و وقار اور ایمانداری کو "اسپیشل ٹیلنٹ" سے زیادہ اہمیت نہیں دینی چاہیئے'۔

یہ بھی پڑھیئے: شرجیل خان کی فٹنس سے خوش نہیں ہوں، مصباح الحق

محمد حفیظ کی اس ٹویٹ پر انہیں پی سی بی کی جانب سے سرزنش کا سامنا کرنا پڑا تھا اور ان سے کہا گیا تھا کہ وہ اپنے کام سے کام رکھیں جبکہ بھارت کے سابق کرکٹر اور تجزیہ کار آکاش چوپڑا نے اُن کے حق میں آواز بلند کی تھی اور کہا تھا کہ حفیظ کو بولنے دیا جائے۔